Մանվել Գրիգորյանը միայն բանակից որևէ բան գողացած կամ դրա համար կասկածվող մի մարդ չէ, այլ համակարգ, մտածողություն, մշակույթ, արժեհամակարգ… Մանվել Գրիգորյանը պետության գիտակցման բացակայությունն է ոչ միայն նրա, այլ նաև այն մարդկանց մեջ, որոնց գործուն աջակցությամբ և լռության պայմաններում է ձևավորվել նրա տեսակը… Մանվել Գրիգորյանն իր արարքների համար պետք է տա իրավական պատասխան, բայց դա խնդրի միայն մի կողմն է, խնդրի մյուս կողմը բարոյականն ու արժեքայինն է:
Այն, ինչ գողացվել է, Մանվել Գրիգորյանի կամ որևէ մեկի նկուղում չէ, այլ բոլորի աչքի առաջ պետությունն է գողացվել, գողացվել է պետություն ունենալու պատմական հնարավորությունը:
Թեմայի շուրջ «Առաջին լրատվական»- ի հետ զրույցում «Արաբո» ջոկատի հրամանատար Մանվել Եղիազարյանը նշեց, որ կատարվածի հետ կապված՝ ծանր ապրումներ է ունեցել:
«Ես այդ զգացումներն ունեցել եմ նաև 1993-ին… , երբ սկսվեց պառակտումը, տեղ էին տալիս նրանց, ովքեր ենթարկվում էին, գեներալ էին սարքում նրանց, ովքեր կամակատար էին դառնում… 94թ.-ին պատերազմը վերջացավ, և մեծ թափով սկսվեց ալան-թալանը: Ես հեռու մնացի այդ մարդկանցից, որովհետև ես չէի գնացել թալանի…
Կարևորն այստեղ օգնությունների խնդիրը չէր, բարոյահոգեպես ընկճվեցին ազատամարտի մասնակիցները, նրանց այնպես վարկաբեկեցին, ժողովրդի աչքից գցեցին, դա սկսեց առաջին իշխանությունների օրոք, սարսափելի թափ առավ երկրորդ, երրորդ իշխանությունների օրոք:
Այսօր զինվորին տրամադրված օգնությունը, զինվորի մի կտոր հացը հայտնվում է ինչ-որ մեկի նկուղում և մեծ քանակությամբ: Ես ապրիլյանի ժամանակ եղել եմ պաշտպանական գծում, տեղեր կային՝ ուտելու բան չկար, ծխախոտ չկար, տրանսպորտ չկար:
Բայց սա ավելի մեծ բարոյական վնաս է, քան իրավական: Որպես հայորդի ես՝ ինքս, թևաթափ եմ եղել, մենք գիտեինք, որ չորս կողմն ալան-թալան է, բայց որ այսքան էժան… Ուրեմն մեր նախկին իշխանությունները այդ տեսակին են տեղ տվել, այդ տեսակն է հայտնվել ասողի դիրքում: Մենք շատ արհեստական բաներ ունեցանք, արհեստական հերոսներ: Զոհված տղաներ կան, որ այդ արհեստական հերոսներից հազար անգամ շատ բան են արել: Այս արհեստական գեներալները, արհեստական հարուստները բերեցին նրան, որ մենք ակամա ունենացանք «Մարաշի խումբ», «Սասնա ծռեր»… Սուտը դարձել է լոզունգ, ավազակը՝ բարերար: Ժամանակին իշխանությունները կարողացան այնպիսի իրավիճակ ստեղծել, որ թե փող ունես, մարդ ես, չունես՝ մարդ չես:
Ես շատ ապրումներ ունեցա: Հերոսն իրավունք չունի թալանչի լինելու, իրավունք չունի սրիկա լինելու, անգամ ստախոս լինելու իրավունք չունի: Հերոսը պիտի խորհրդանիշ լինի, պետք է լինի ջահ՝ երիտասարդ սերունդ դաստիարակելու համար»:
«Միայն Մանվել Գրիգերյանը չէ, կարելի է ասել՝ մի մեծ ճակատամարտ դեռ առջևում է: Այդպիսի սեփականության տրցակներ մի 30 կամ 50 հոգի ունեն, պետք է բացահայտել և բոլորը պետք է պատասխան տան, որ հասկանան համաձայնություն կլինի այն ժամանակ, երբ որ գողոնը կվերադարձնեն»,- նշեց Մ. Եղիազարյանը՝ հավելելով, որ նոր իշխանության ուսերին սարսափելի մեծ գործ է դրված:
